Երևանի Ֆ. Նանսենի անվան հ. 150 հիմն. դպրոց
Երևանի Ֆ. Նանսենի անվան հ.150 դպրոցը հիմնադրվել 1970թ. որպես ռուսական դպրոց: Այսօր այն հայկական հիմնական դպրոց է` ռուսերենի խորացված ուսուցմամբ, և ունի 1037 աշակերտ: 2000թ.-ին/ դպրոցն անվանակոչվել է նորվեգացի մեծ մարդասեր Ֆրիտյոֆ Նանսեի անունով:2003թ.-ից մինչ օրս դպրոցն իրականացնում է ներառական կրթություն, իսկ 2004-ից ԿԳ նախարարի հրամանով ճանաչվել է ներառական կրթություն իրականացնող փորձարարական դպրոց և վերապատրաստման կենտրոն: 2004թ.-ին ԿԳՆ–ի կողմից դպրոցը ճանաչվել է ուսուցիչների վերապատրաստման կենտրոն Նոր Նորք Ավան –Առինջ համայնքների դպրոցների ուսուցիչների համար: Դպրոցը լիովին վերանորոգված է և աշակերտների համար ստեղծված են բարենպաստ պայմաններ: Դասարանները հագեցած են աշակերտական գույքով, ուսումնաօժանդակ, ուսումնամեթոդական նյութերով և դիդակտիկ պարագաներով: Դպրոցում տեղադրված են թեքահարթակներ կրթության հատուկ պայմանների կարիք ունեցող աշակերտների համար, սանհանգույցները նույնպես հարմարեցված են կրթության առանձնահատուկ պայմանների կարիք ունեցող աշակերտներին: Դպրոցն ունի վերանորոգված սպորտ դահլիճ և բաց սպորտահրապարակ, Նանսենի սրահ և համակարգչային երկու դասասենյակ:
Դպրոցը համագործակցում է տարբեր կազմակերպությունների հետ: Համագործակցում է <<Փրկենք երեխաներին>> կազմակերպության կողմից կազմակերպած <<Հանուն երեխաների մասնակցության>> ծրագրին, <<Կտակի>>, <<Հույսի կամուրջ>>, <<Քայլ առ քայլ>> կազմակերպությունների, <<Դպրոց կենտրոնների միություն>> իրավաբանական անձանց
միության, <<Մանկապատանեկան տուրիզմ>>, <<ԷՌՕԴԾ>>, <<Ջինիշյան հիմնադրամ>>-ի հետ: Իրականացնում է ծրագիր Խ. Աբովյանի անվան պետական մանկավարժական համալսարանի հետ համատեղ, որը վերաբերում է անձի՝ մասնավորապես աշակերտի հոգեբանանական պաշտպանվածության բարձրացմանը, սթրեսային իրավիճակների կանխարգելմանը: Ինչպես նաև շարունակվում են մեր ծրագրերը բժշկահոգեբանամանկավարժական գնահատման կենտրոնի հետ: Ակտիվ համագործակցում է «Ապագա» հոգեբանական ծառայության կենտրոնի հետ:
Դպրոցում կազմակերպվում են բազմաթիվ և բազմաբովանդակ միջոցառումներ, բաց դասեր, քննարկումներ, նոր տեխնոլոգիաների օգտագործմամբ: Դպրոցն ունի շատ գեղեցիկ ավանդույթ. Ուստարին ավարտել երգի փառատոնով` բոլոր դասարանների մասնակցությամբ: Տնօրենության կողմից ամփոփվում է տարվա ընթացքում կատարված աշխատանքները և պատվոգրեր ու շնորհակալագրեր են հանձնվում լավագույն աշակերտներին, ծնողներին, ուսուցիչներին:
