Նոյեմբերի 11-21 Երևանի Ֆ. Նանսենի անվան հ. 150 հիմնական դպրոցում հայտարարված էր մաթեմատիկայի 10-օրյակ: 10-օրյակի շրջանակներում տեղի ունեցան բաց  դասեր տարբեր դասարաններում: Իսկ  նոյեմբերի 22-ին տեղի ունեցավ դաս-միջոցառում  <<Տեղեկատվական տեխնոլոգիաներ>>  վերնագրով: Դասի նպատակն էր աշակերտներին ծանոթացնել 2013 թ-ին Մերգելյան ինստիտուտում  կազմակերպված թվային տեխնոլոգիայի ցուցահանդեսի նմուշներին: Ընդ որում տեղեկատվական տեխնոլոգիաների կենտրոնի ստեղծումը բերում է այն գաղափարին, որ առանց հզոր մաթեմատիկայի անհնար է հզոր պետականություն: Միջոցառմանը ներկա էին աշակերտներ, ուսուցիչներ, դպրոցի տնօրեն Մ. Հայրապետյանը,  ինչպես նաև կրթության վարչության պետ Գ. Սողոմոնյանը:

 Նոյեմբերի 14-ին 5գ դասարանի աշակերտները ուսուցչուհի Ա. Հարությունյանի ղեկավարությամբ  հանդես եկան դաս-միջոցառմամբ բնագիտություն առարկայից` նվիրված «Տիեզերք» թեմային: Միջոցառման ընթացքում աշակերտները ներկայացրեցին տիեզերքի խորհրդավոր գաղտնիքները, նրա առեղծվածները, գիտական ուսումնասիրությունների արդյունքում արված հայտնագործություններ: Հանդես եկան Արեգակնային համակարգի, մոլորակների, նրանց արբանյակների անունների վերաբերյալ բազմաթիվ հետաքրքիր տեղեկություններով, գիտնականների կողմից կատարված բացահայտումներով ու գիտական փաստերով: Միջոցառման ընթացքում ցուցադրվեցին Ծիր Կաթինի, աստղերի և համաստեղությունների, մոլորակների, նրանց արբանյակների, երկնաքարերի և գիսավորների նկարներ, ինչպես նաև աշակերտների կատարմամբ հնչեցին երգեր Երկիր մոլորակի և տիեզերքի մասին: 

 Բնագիտության տասնօրյակի շրջանակներում տեղի ունեցավ բաց դաս  կենսաբանություն առարկայից: Ամփոփման դաս էր <<Զգայարաններ>> թեմայով: Դասի կառուցվածքը և փուլերը շատ հետաքրքիր էին կազմակերպված: Համակարգչային և դիդակտիկ նյութերի միջոցով ներկայացվեցին հինգ զգայարանները: Նախապես բաժանված խմբերը տեղեկություններ և հետաքրքիր փաստեր ներկայացրեցին`  կապված թեմայի հետ: Ամփոփումը համալրեց հետաքրքիր տեսանյութը:
 Դասը կազմակերպել էր կենսաբանության ուսուցչուհի Ք. Գյուլումյանը 8-րդ դասարանում: 

 Հոկտեմբերի 31-ին և նոյեմբերի 13-ին Երևանի Ֆ. Նանսենի անվան հ. 150 հիմն. դպրոցում տեղի ունեցան գործնական աշակերտական բանավեճեր   <<Դպրոցական համազգեստը պարտադիր է>> և <<Համակարգչային խաղերը բացասաբար են ազդում դեռահասների առողջության վրա>> թեմաներով: Բանավեճերը կազմակերպել էր Ք. Գյուլումյանը «Ջինիշյան» հիշատակի հիմնադրամի (ՋՀՀ) կողմից իրականացվող կրթական ծրագրի շրջանակներում: Բանավեճին մասնակցում էին 7-9-րդ դասարանի աշակերտները, որոնք ներգրավված էին բանավեճի ակումբում:
 Բանավեճի միջոցով աշակերտները ձեռք են բերում այնպիսի հմտություններ, որոնց միջոցով կարող են ծավալել առողջ քննարկում: Բանավեճը աշակերտներին հնարավորություն է տալիս արտահայտվել, դիմացինին համոզել, լսել այլ կարծիքներ, հարգել ուրիշի կարծիքը:

 Բնագիտության տասնօրյակի շրջանակներում տեղի ունեցավ բաց դաս <<Սևանա լիճը>>  թեմայով: Դասը կազմակերպել էին Ա. Սայադյանը, Լ. Պողոսյանը, որը անցկացվեց 7-րդ դասարաններում: